لو قلتلك يا اخي شهر واحد هتشتغل فيه و تاخذ أكبر مبلغ هتاخده في حياتك، هتصبر الشهر ده و الا لا؟

لو سألتك يا اختي شهر واحد تذاكري فيه و تحصلي على أعلى شهادة علمية في الكون هتجتهدي و الا لا ؟؟

أهو أنا بقولكم شهر واحد نصبر فيه و ناخذ كل الثوا...ب و الرحمة و المغفرة اللي قلنا عليها..

هنصبر و الا لا يا شباب بعدما عرفنا خطورة و أهمية شهر رمضان.. ؟؟

لما تعرف ان الصحابة و السلف الصالح كانوا بيدعوا ربنا قبل رمضان ب 6 اشهر انه يبلغهم رمضان.. و بعد شهر رمضان ما يعدي.. يفضلوا يدعوا ربنا بقية السنة انه يتقبل منهم أعمالهم في رمضان.. يعني رمضان كان محور حياتهم طول السنة..

اناس دي عرفت يعني ايه رمضان؛ فكان لازم تبقى دي احوالهم قبل و بعد رمضان..

يا ترى مين فينا زيهم..؟؟
مين فينا اللي هيقدر الموسم العظيم ده و يعطيه حقه..
مين فينا اللي الشيطان مش هيضحك عليه و يخليه يقعد يسوف لغاية ما الشهر يعدي و هو لسه غافل..

أنا عايزك تفكر كويس:
انت لو ربنا احياك لحد رمضان يبقى انت اخدت فرصة متتخيلهاش..!! هتقول ايه؟؟

هقولك: كام واحد من اصحابك او من قرايبك مات قبل رمضان..؟؟ كام صفحة كل يوم في الجرائد نعي لناس ماتت قبل رمضان..؟؟؟

فلو ربنا بلغك رمضان، لازم تحس بقيمة النعمة دي.. و تشكرها حق شكرها بانك تستغلها احسن استغلال و تكون من الفائزين برحمات ربنا و العتق من النار في الشهر المبارك ده..

لازم تجتهد و تجيب اقصى جهد عندك..
عارف ليه ؟؟

لانك متعرفش.. هل هتعيش لرمضان اللي جاي و الا لا ؟؟ انت مش ضامن عمرك للسنة الجاية !!
ممكن يكون ده آخر رمضان في حياتك..!!

خلي الكلام ده في بالك على طول.. علشان متسوفش و يكون حافز و منشط ليك على الطاعة في رمضان..

و خلي شعارك السنة دي:
لئن ادركت رمضان... ليَرينّ الله ما اصنع.